Co’l tornar a parlar ancora de come se zoghea, me vien in mente quante corse che se fea su e do par le stradeo, se i ne lassea, se n’dea a sfogarse entro par qualche cortivo.
I cortivi i era i nostri stadi, le nostre palestre, le nostre pedane, le nostre piste. I boce del dì de n’coi no i sa cossa che olea dir par noi gòderse con poc, co le nostre strambàrie (e nostra mare: cosa atù te l’zevèl!).Me pense co se zoghea a le balete (ades i ghe ciama biglie e le tute bèle lustre e co le striche piturade).Le nostre, poarete e strussie, le era de tera-cota tute de n’color: o giale, o celeste, o ross, o vert e po, co te le avea doperade an cin, le se smariìa e le deventada maron.
Me ricorde “spana chech”, “nicia”, “busa”. Ma pì de tut se se imborazea co se fea le piste. Se se catea qualche cortivo co n’in de giara o con calcossa altro par far i muret de la pista, se se incontentea e cussì se podea zogar anca se se stea in cità.
Ma al pì bel de tut era le grave del Piave, ande che se podea far le piste grande, co le curve bele larghe, co i trabocheti. E se stea la a zogar ore e straore. Le grave le era la nostra spiaja, al nostro pì bel “luna park”. Se fea tante altre robe, parchè ghe n’era i boscàt, i fosàt co i bùdoi, i sass grosi e quei picioi, le scaie che se le fea saltar su lìaqua. Al gran momento quando che se n’dea entro in te l’aqua che, co la rivea sul bunìgol, te vegnea i sgrìsoi e la pel de pita.
Se no se podea far le piste co la sàbia e co la giara, se zoghea ben a calcossa altro.
Alora quei che stea in cità i ne insegnea a piturar sui marcìapie co l’ges e co i matoni e, par via che le balete no se podea usarle, se zoghea ai bioldi.
Erelo che i bioldi? I esiste anca al dì de n’coi. Ale i tapi corona, che adès se i buta via! I paroni de le ostarìe i rincurea i stroppi de le bire, de le aranciate e de le gasose (le aque minerali le e rivade dopo; al vin al era te le bottiglie o te i butiglioi col stròpol de suro) e i ghe n’avea sempre na bela scorta. Parchè? Ve conte an fato che no l’ghe centra co i zoghi, ma vel dighe su i stess. Zerche de soiegarme. Penseve cossa che olea dìr sparagnar. Co i bioldi i fea come na spezie de tende da meter su le porte de le botteghe co èra istà. Su tanti cordoi de spago i strùchea su con a tanaia i stroppi un par un, fin da far na riga longa. Tute le righe le vegnea tacade su n’tòc de lenc. Tut sto impiastro, che se podea cavarlo e meterlo, al vegnea pìcà su sot la parte alta de la porta. Co lìera su, vegnea zo na bela tenda colorata, ma che la fea àn gran bacan apena che se la tochea, parchè le file de spago co i bioldi co le sbatta una con quel’altra, penseve voialtri, che casìn che la fea. Se se inacordea pulito co un l’andea entro o alvegnea fora da na bottega.
Ma de bioldi ghe ne restea anca par noi boce par zogar. Co le nostre piste par tera, anca se lìera su l’iss, su le piere o sul’asfalto, se se godea àn sàc e na sporta. E l’autodromo (par finta) par far corer i bioldi a forza de (biscotti), era na roba che la ne fea andar proprio su de giri.
ricordati da Dodo Crespan
